Kyoon?

Maharat hai har kaam mein mere
Phir nakami ka ehsaas hai kyoon

Kehta hoon khud ko Khuda ka banda
Jaam e ishq ki pyaas hai kyoon

Mohabbat ka izhar us ka suboot to nahi
Sub kho dene ka iltimaas hai kyoon

Arse se hoon apni uljhanon ka qaidi
Azadi ki umeed, roshni ki aas hai kyoon

Woh dekh nahi sakte meri soch ki aankh se
Phir dunya ki baaton ka paas hai kyoon

Jeene ke falsafe se waqif hoon agar
Zindagi mein zindagi ka aflaas hai kyoon